Dîvân İder Vakt-i Seher

Dîvân ider vakt-i seher nev-rûz-ı sultânî meger
Devrân ufukdan gösterür taht-ı zümürrüd tâc-ı zer

‘Âlem müzeyyen pertev-i hûrşîd-i ‘âlem-tâb ile
Nat’-ı ser-â-ser saldılar rûy-ı zemîne ser-be-ser

Fasl-ı şitâda beyza-i sîmîn idi gûy-ı zemîn
Aldı kanadı altına sîmürg-i zerrîn-bâl ü per

Hvâb-ı ‘ademden dîde-i ezhârı bî-dâr eyledi
Tahrîk-i bâd-ı subh-dem âvâze-i mürg-i seher

Bâkî nisâr-ı makdem-i sultân-ı ‘âlî-şân içün
Destinde şâh-ı gül tutar la’lîn tabak lü’lû-yı ter

Sultân Murâd-ı tâcver fermân-revâ-yı bahr u ber
Sâhib-kırân-ı dâd-ger şâhenşeh-i ‘âlî-nazar

Destân-sarâ-yı midhati şâh-ı tarabda nagme-sâz
Tâvûs-ı baht u devleti bâm-ı felekde cilveger