El Hilâl-i ‘Iyd Gözler Ol Seg-i Dîvâne-vâr

El hilâl-i ‘ıyd gözler ol seg-i dîvâne-vâr
Atun izine ırakdan rûy-mâl üstindedür

N’ola ger ölmezden evvel ölse erbâb-ı kaza
Müddet eksülmekde vü ‘ömr intikâl üstindedür

Yaşdan akça döküp gün sayup eyler göz hesâb
Havf-ı ‘azl ile dil ü cân i’tizâl üstindedür

Bâl ü perrüm yanalı yangında tüyüm düzmedüm
Şâh-bâz-ı gam anunçün murg-ı mâl üstindedür

Şeh buyurmış ben terakkî ile mansıb umdugum
‘Âşık-ı divânenün fikri muhâl üstindedür

Hâşe-lillâh ki ola yanında bu fikr-i muhâl
Çün kemâl ehline ihsânı kemâl üstindedür

Pertev-i mihrünle günden güne artur etmegüm
Mâh-ı feyz-i mihr ile kesb-i kemâl üstindedür (50b)

Pâdişâhum pertev-i mihrün ten-i hâkîye sal
Pertev-i hûrşîdi hâk-i derr-i mâl üstindedür

Cümle ‘âlem bana bed-hâh u yezîd olsa ne gam
Himmetün meddür çekilmiş çünki el üstindedür

Âfitâbun niçe ki sadr-ı sa’âdetdür yiri
Meskeni mâh-ı nevün saff-ı ni’âl üstindedür

Rişte-i devrân gibi ‘ömrün ola dûr u dırâz
Devletün ola o silk-i mâh u sâl üstindedür