Kanumı İçmege Ol

Kanumı içmege ol âfet-i cânum özenür
Meyl ider ölmege dil rûh-ı revânum özenür

Tıfldur pend-i peder diñlemez ol mâh dahı
Şîr-i mâder yirine içmege kanum özenür

Ârzû eyler imiş bâr-ı belâ çekdügümi
Çekeyin bârî çün ol şûh-ı cihânum özenür

Pîrlikde bu dü-tâ kaddümi çeng eylemege
Neydügin bilmeyüp ol tâze cevânum özenür

Derd ü gam kaddümi ham kılsa göñül çekmez elem
Kemer itmek diler ol mûy-miyânum özenür

Tîr-i âh-ı seherî çekdügüm ister dildâr
Çekeyin n’olsa gerek kaşı kemânum özenür

Dimez ol husrev-i hûbân-ı cihân ey Bâkî
La’l-i şîrînüme Ferhâd-ı zamânum özenür