Cûybâr-ı Vâdî-i Gam

Cûybâr-ı vâdî-i gam eşk-i çeşm-i ter yiter
Rûy-ı zerd ol cûybâra berg-i nîlûfer yiter

Agzı la’lîn hokka yâkût-ı müferrih lebleri
Cevherî terkîb isterseñ leb-i dil-ber yiter

Hvâce ursun başına destâr-ı mermerşâhîyi
Lâubâlî ‘âşıkuñ farkında bir sâgar yiter

Pâdişâh-ı ‘aşka besdür gûşe-i külhan serîr
Bister-i sincâb ise maksûd hâkister yiter

Bâkıyâ meyi eylemez ârâyiş-i dünyâya dil
Rûy-ı zerd ü gevher-i eşküm zer ü zîver yiter