Tâli’ İtdi Beni Ser-geşte-i ‘Işk-ı Cânân

Tâli’ itdi beni ser-geşte-i ‘ışk-ı cânân
Tâli’ itdi beni meftûn-ı belâ-yı hicrân

Tâli’ itdi gam-ı ‘ışk ile beni ser-gerdân
Tâli’ itdi beni hicrân elemiyle nâlân

Bana tâli’den irer her ne irerse yârân
Gam-ı cânân elem-i ‘ışk u belâ-yı hicrân

Anı tâli’dür iden ser-keş ü tünd ü fettân
Beni tâli’dür iden böyle nicitsün cânân

N’ola kan aglayup eylersem eger âh u figân
Dâd u feryâd bu tâli’den amân el-âmân

Her kaçan yâr vefâ itmege peymân eyler
Tâli’-i nahsum anı yine peşîmân eyler