Na‘t-ı Şerîf

Mestem ammâ ne mest bâde vü câm
Rindem ammâ ne rind dürd-âşâm
Oldı bir dilber-i semen-bûya
Dil-i dîvâne ‘âşık-ı nâ-kâm
Hicri âteş-fürûz sabr u karâr
Va‘de-i vaslı düşmen-i ârâm
Ruhı hurşîd-i zerre-sûz ammâ
Mehdür ebrûsı lîk mâh-ı sıyâm
Nigehî neş’e-bahş-ı rüsvâyî
Gamze-i şûhı hûn-ı dil-âşâm
Çîn-i zülfinde mübtelâ- âşûb
Künc-i çeşminde nâz-ı mest-i müdâm
Sıfat-ı ‘ârızı netâyic-i dîn
Na‘t-ı zâtı şe‘â’irü’l-İslâm
Nâm-ı nâmîsin eyledi Ahmed
Hazret-i zi’l-celâl-i ve’l-ikrâm
Oldur ol kim zamîr-i rûşenidür
Mazhar-ı vahy ü menba‘-ı ilhâm
Oldur ol kim Hudâ-yı ‘azze ve cell
İtdi ser-hayl-i enbiyâ-yı kirâm
Oldur ol sâkî-i kerem-pîşe
Ki senâ-hˇ ânıdur havâs u ‘avâm
Bezl idince mey-i şefâ‘at olur
Leb-i ‘isyâna harf-i tevbe harâm
İtse teklîf-i tâ‘at eyler idi
Serv-i bâr-âver rükû‘ u kıyâm
‘Ameli olmasaydı râh-nümâ
Lâ-cerem çün ‘ibâdet-i esnâm
Tâ-kıyâmet olurdı ‘uşşâka
Tâk-ı mihrâba secde bî-hengâm
Pîş-i ‘ilminde tıfl-ı ebced-hˇ ân
‘Akl-ı evvel çü kuvvet-i evhâm
Fehmi mâ-fi’z-zamîre dânâdur
Bî-hurûf-ı nidâ vü istifhâm
Hilkati mebde’-i zuhûr-ı cihân
Bi‘seti bâ‘is-i hidâyet-i ‘âm
Hüsn-i hulkı müsellem-i âfâk
Lutf-ı nutkı mu‘abbir-i ilhâm
Merdüm-i çeşm-i düşmeni olsun
Giryeden çün şükûfe-i bâdâm
Ger fesân olsa seng-i kahrı olur
Katl-i a‘dâya zü’l-fekâr-ı benâm
Olsa hilmi mülâyemet-küster
İdüp izhâr-ı süstî-i endâm
Tâ-kıyâmet olurdı çille-nişîn
Kavs-ı merd-efgen-i kazâda sihâm
Mihterâ bihterâ bihînterâ
Benem Âgâh-ı kemterîne gulâm
Benem ol kim bu köhne meykedede
Dürd-i peymâne idi ‘ıtr-ı meşâmm
Benem ol kim libâs-ı ‘ismetümi
İtmişem ma‘siyetle zulmetfâm
Dûş-ı ervâha zînet olduk da
Tâzeden köhne hırka-i ecsâm
Nem-i lutfunla eyle dâmenümi
Pâkter-i hem-çü câme-i ihrâm
Kanda ben kanda da‘vîy-i na‘tun
Gül-i hurşîde olmaz istişmâm
Defter-i dehri ser-be-ser gördüm
Bulmadum bir du‘â-yı hayr-encâm
Ki olup devlet-i kabûle karîn
Ref‘ ola dîdeden hicâb-ı zalâm
Tâ ki hurşîd ü mâh u encüm ile
Ola tezyîn sipihr-i mînâfâm
Ola envâr-ı gûşvâre-i ‘arş
Dem-be-dem gevher-i salât ü selâm