Âgâz-ı Gazeliyyât 160

İ‘tibâr-ı halkdan bîgâne olmışlardanuz
Çok zamân ‘ankâ ile hemhâne olmışlardanuz
Kayd-ı zülf-i yârdan mümkün midür olmak halâs
Pîç ü tâb-ı turre-i cânâne olmışlardanuz
Duhter-i rez bi-sebeb gözden bırakmışdur bizi
Hasret-endûz-ı leb-i peymâne olmışlardanuz
Sâyemüz ey şem‘-i bezm-ârâ sa‘âdetsüz degül
Biz hümâlukdan geçüp pervâne olmışlardanuz
Biz harâb olmakda bulduk feyz-âbâd olmanun
Hızra istignâ ider virâne olmışlardanuz
Vahşet eyler murg-ı vasl Âgâh gördükde bizi
Dâm-ı tezvîr içre gûyâ dâne olmışlardanuz