Dîvân-ı İlâhîyât 101

İşitdinse nidâ-yı Hak
Gel Allah'a gel Allah'a
Edip varın fedâ-yı Hak
Gel Allah'a gel Allah'a

Kul olmağı sa'âdet bil
Kaçan kurtulmaz ey gâfil
Ola gör hazrete vâsıl
Gel Allah'a gel Allah'a

Geçip fânî vücûdundan
Fedâ et Hakk'a cân ü ten
Kayır ahvâlini erken
Gel Allah'a gel Allah'a

Ni'am gerçi elemden yeğ
Velî mün'im ni'amdan yeğ
Vücûd ey dil ademden yeğ
Gel Allah'a gel Allah'a

Bu mâl ü mülke aldanma
Cihân bâkî kala sanma
El için odlara yanma
Gel Allah'a gel Allah'a

Beğim mâl ile iş bitmez
Kazandığın nene yitmez
Kimi gördün koyup gitmez
Gel Allah'a gel Allah'a

Cihân bir köhne câdûdur
Şu kim aldanmaz usludur
Hüdâyî'nin sözü budur
Gel Allah'a gel Allah'a