Şol Selâmî Ki Ola Teşne Çeşme-i Hayvân Aña

Şol Selâmî ki ola teşne çeşme-i hayvân aña
Şol Selâmî ki ola fitne ravza-i rıdvân aña

Şol Selâmî ki aña mahrem râhat-ı ervâhdur
Şol Selâmî ki ola hem-dem rahmet-i Rahmân aña

Şol Selâmî kim vire ol bâg-ı Cennet’den haber
Şol Selâmî ki ola vâlih hûr-ıla vildân aña

Şol Selâmî ki oradan Îsî urur-ıdı nefes
Şol Selâmî ki ola tâlib Mûsî-yi İmrân aña

Şol Selâmî ki-ister-idi zâr olup Yakûb anı
Şol Selâmî ki ola râgıb Yûsuf-ı Kenân aña

Şol Selâmî kim ola hem-dem aña Rûhu’l-Kudüs
Şol Selâmî ki ide cândan müjde-i peymân aña

Şol Selâmî kim anuñ bigi ola bâd-ı bahâr
Şol Selâmî ki ide gayret katre-i neysân aña

Şol Selâmî ki ola Hızr-ı zinde aña hem sebîl
Şol Selâmî kim ire İlyâs’dan ilân aña

Şol Selâmî ki ola nergis her gice aña muntazır
Şol Selâmî kim heves ola gül-i handân aña

Şol Selâmî ki ola sünbül zülfine tâbî anuñ
Şol Selâmî ki ola vâlih lâle-i numân aña

Şol Selâmî ki ola tâze ışkı-y-ıla yâsemîn
Şol Selâmî ki ola reyhân cân-ıla hayrân aña

Şol Selâmî kim getürmişdi resûle Cebra’îl
Şol Selâmî kim buyurdı virmege Yezdân aña

Şol Selâmî ki ana hâdim lal ü kul anber ola
Şol Selâmî ki ola lâle lü’lü-yi rahşân aña

Şol Selâmî kim işâret itdi yümnîye resûl
Şol Selâmî kim beşâret-bahşdur Kur’ân aña

Şol Selâmî ki irmiye ihlasına hergiz riyâ
Şol Selâmî ki ola reh-ber dîn-ile îmân aña

Şol Selâmî kim adedde eyle ola irmeye
Reml ü neml ü fevc ü mevc-i Kulzüm ü Ummân aña

Şol Selâmî ki ola Mecnûn aña akl-ıla revân
Şol Selâmî ki ola meftûn hem-dil ü hem-cân aña

Birbirem bâd-ı Bihişt-ile şehüñ eyvânına (?)
Kim iremez rifatinden kulle-i keyvân aña

Ol ki dirler Mir Sülmân İbn-i Sultân Bâyezîd
İbn-i Gâzî Han Murad İbn-i Melik Orhan aña

Ögreney-di nice olur mülkde dâd u dihiş
Ger diri kalıb kul olsa şâh-ı Nûşürvân aña

Fûr-ı Hind’de olsa-y-ıdı ferr-i kem-ter kulınuñ
Hiç bulımazdı zafer İskender-i Yûnân aña

Ger şükûhından siper duta-y-ıdı İsfendiyâr
Ohını irgürmez-idi Rüstem-i Destân aña

Yüz sürerler tahtına kisri-y-ile kaysar anuñ
Baş ururlar bahtı-çun fagfûr-ıla hâkân aña

Atınuñ nali olam diyü hevesde eriyü
İki kez her ayda halka olur meh-i tâbân aña

Gün ayagı tozını eylemeg-içün tâc-ı ser
Encümüñ nakdini virüp bulsa olur erzân aña

Hwânına biryân olayım diyü say ider Hamel
«evr diler ârzu-y-ıla ki ola kurbân aña

Himmetini vezn itmege terâzû bulsalar
Arş-ıla kürsî ola-y-dı keffe-i mîzân aña

Mîr Sülmândur Süleymân-ı zemâne kim olur
Vahş u tayr u ins-ile cin bende-i fermân aña

Oldur ol şâh-ı cüvân-devlet ki bî-şek an-karîb
Tâbi ü tâbi olur Îrân-ıla Tûrân aña

Sâcid ü hâşi bu yidi encüm ü altı cihet
Râki ü hâzi tokuz eflâk ü dörd erkân aña

Cûdı anuñ az bahşiş itdüginde hergiz yitmeye
Mâl u genc ü Mısr u Şâm u mülk-i İsfâhân aña

Bezmi koyup rezme kasd ider-ise bir azm-ile
Feth ola Rûm’dan tâ hadd-i Hindüstân aña

Kudret-ile fikreti irmiş-durur ol hadde kim
Ne kadar düşvâr iş olursa gelür âsân aña

Yaraşur dünyâda ne varsa selâtîn u mülûk
Ki eydeler Sultân bin-i Sultân bin-i Siltân aña

Çün melâyik yirde gökde aña iderler duâ
Bâri kimdür âdemi ki olmaya midhat-hwân aña

Çünki gördi talatınuñ nûrını şems-i felek
Seyr iderken mâh bigi kaldı ser-gerdân aña

Kılıcınuñ darbı kûh-ı sahreyi ide kalem
Ohınuñ peykânı irse dutmaya sindân aña

Atı fikret bigi çünkim azm ide bir maksada
Ne sabâ irişür ü ne berk-ı nûr-efşân aña

Mürg-i perrân iremez atına vü hengâm-ı sayd
Ne hod arslan döyer ü ne bebr ü ne kaplan aña

Yire düşer korhusından bu felekdeki ukâb
Kaşına şâhuñ elinden gidicek perrân aña

Şehlerüñ çevgânı vü hem topı agaç olıcak
Şems gerek top ola vü mâh-ı nev çevgân aña

Bir gül-istân nakş itdi midhatüñde Ahmedî
Ki oldı hayrân Mâni itdügi nigâr-istân aña

Çünki levha yüridür şâhuñ senâsında kalem
Levh-i mahfûz olsa gerek defter ü dîvân aña

Dâi oldur kim duâñı idicegez her-fasîh
Diye âmîn Rûm’dan tâ hadd-i Türk-istân aña

Pâdişâhuñ gül yüzinden bini mahrûm eyledi
Bu gözüm kim kût oldı lâle bigi kan aña

Şâhı göreli gözüm çün itmedi gayre nazar
Niredendür bu belâ vü renc-i bî-pâyân aña

Ne güher kim nazm itdüm medhde bagışladum
Ol şaha kim hâk-i rehdür lal-ile mercân aña

Lîki bu güher bahâsın şâhdan nakd isterem
Vade-i nisyedir-ise yoh-durur imkân aña

Pâdişâhuñ gaynı elinden isderem ayn-ı ata
Şol kadar kim şâd olalar işidüp ayân aña

Hoş dut ol kuluñı kim hem fazl u nazm u nesrde
Gaşn iderler Enverî vü Hwâce vü Selmân aña

Yiri-durur ne kadar tahsîn iderse şâh anı
Hem sezâdur ne kadar kılur-ısa ihsân aña

Kapuña yüz sürdügümi her ki işitdi didi
Kim viriser şâh mâl u mülk ü hân ü mân aña

Anı it baña şehâ kim dost u düşmen işidüp
Dimesün kim degmedi cüz hayret ü hirmân aña

Şol sebeb kim davet-ile şeh getürdi kulını
Bir muammadur kim irmez fikret-i insân aña

Ne sebebden pây-bûsuñ bulalı adı anuñ
Nâkıl oldı dir-iken halk-ı cihân Hassân aña

Pâk-durur ismeti Meryem bigi ol Îsî-demüñ
Pes nedündür iy aceb bu töhmet ü bühtân aña

Dile düşdi söz bigi hak söz didügi-çün dili
Lâ-büd oldı bu bihişt-âbâd bir zindân aña

Pâdişâhuñ âşıkıdur geldi işigin öpmege
Pâdişâhı sevdügi-durur hemîn isyân aña

Niçe ki ola pâyi-dâr u ser-sebük kutb-ı medâr
Niçe ki ola çarh u encüm virile ferman aña

Pâyidâr olsun şeh ü dönsün murâdınca medâr
Şarkdan tâ garba olsun mevzi-i seyrân aña

Her cemâle ki anda vardur degmesün ayne’l-kemâl
Hoœ kemâl anuñ-durur kim irmesün noksân aña

Buyrugından baş çeken boynın nite kim pey verüp
Ejdehây u mâr olsun ol reg-i şiryân aña

Kullıguña her ki İbrâhîm var ola Halîl
Bag olsun u gül-üstân âteş-i sûzân aña