Âgâz-ı Gazeliyyât 353

Telâşa düşme ki ol nahl-i nâz açılmaz mı
Açılsa gonçe-i gül az az açılmaz mı
Kalur mı râz-ı dil-i zâr böyle ser-beste
Dehân-ı şevke-i ehl-i niyâz açılmaz mı
Şüküfte-rû mey-i gülrengden midür dâ’im
Ya kendü kendüye ol ‘işve-bâz açılmaz mı
Hilâl-i mısra‘-ı nâhun bedel-zenümden o mâh
Açıldı ‘ukde-i zülf-i dırâz açılmaz mı
Ne denlü feth-i tılısm-ı murâd-ı müşkil ise
Olunca lutf-ı Hudâ kâr-sâz açılmaz mı
Kalur mı böyle pes-i perdede nihân Âgâh
Nikâb-ı şâhid-i ‘aşk-ı mecâz açılmaz mı